මාළු මිරිස් කිවුවම සමහර අය නම් අකමැති කෑමක්. ඒ සැර නිසයි. ගොඩක් අය මාළුමිරිස් තෙල් දාලා තමයි කන්න කැමති. ඒ, උයනවට වඩා තෙල් දැම්මම ඒකේ තියෙන සැර ටිකක් අඩු වෙන නිසා. හැබැයි ඉතින් මාළු මිරිස් කොහොම ඉවුවත් ඇට ඉවත් කරලා ඉවුවොත් සැර අඩු වෙනවා. ඒත් මේ කියන්න යන්නේ මාළු මිරිස් බැදලා රසට හදන හැටි ගැන. ගෙඩක් අය මේ ක්‍රමේට නම් කැමති වේවි. මාළු මිරිස් නොකන පොඩ්ඩො උනත් මෙහෙම මාළු මිරිස් හදලා දුන්නොත් අනිවාර්යෙන් කනවා. ඔන්න අම්මලාට නම් මේ ලිපිය ගොඩක් වැදගත්වේවි. දැන් අපි කියන්න යන්නේ කොහොමද ගෙදරදීම පහසුවෙන් මාළු මිරිස් බැදුමක් හදන්නේ කියලා..

මේ තියෙන්නේ අවශ්‍ය ද්‍රව්‍ය
මාළු මිරිස් කරල් 5, තම්බා පොඩි කර ගත් අල 200g, සාමාන්‍ය තරමේ ලොකු ළූණු ගෙඩි 3, අඹරා ගත් ඉඟුරු තේ හැඳි 1/2, අඹරා ගත්, සුදු ළූණු තේ හැඳි 1/2, මිරිස් කුඩු තේ හැඳි 1, කහ කුඩු තේ හැඳි 1/4, තුනපහ තේ හැඳි 1, ලුණු තේ හැඳි 1, පොඩියට කපා ගත් අමු මිරිස් 1, තෙල් (බැද ගැනීමට පොල්තෙල් හෝ වෙනත්)

මාළු මිරිස් තැවරුම සඳහා අවශ්‍ය ද්‍රව්‍ය
පාන් පිටි කෝප්ප 1, හාල් පිටි මේස හැඳි 1/2, ලුණු තේ හැඳි 1/2, වතුර කෝප්ප 1/2, කහ කුඩු පදමට, බේකින් පවුඩර් තේ හැඳි 1/2

මෙන්න හදන ක්‍රමය
භාජනයක් ගෙන පොඩි කර ගත් අල වලට ලුණු, කහ සහ තුනපහ එකතු හොඳින් මිශ්‍ර කරන්න. කපා ගත් ළූණු, මිරිස්, ඉඟුරු සහ සුදු ළූණු තෙම්පරාදු කර ගන්න. එයටම අල මිශ්‍රණයත් එකතු කර පිස ගන්න. ඉන්පසුව මාළු මිරිස් කරල් දිග අතට වෙන් නොවෙන ලෙස පලා ඇට ඉවත් කර ගෙන, සදා ගත් අල මිශ්‍රණය පුරවා පසෙකින් තබන්න. තැවරුමට පාන් පිටි, හාල් පිටි, ලුණු, කහ සහ බේකින් පවුඩර් හොඳින් මිශ්‍ර කර ටිකෙන් ටික වතුර එකතු කරමින් උකු බැටර් එකක් සාදා ගන්න. සදා ගත් බැටර් එකේ මාළු මිරිස් කරලින් කරල හොඳින් වැසෙන සේ තවරා රන් පැහැ වන තුරු බැද ගන්න.