තක්කාලි කියන්නේ ආහාර රසගන්වන පළතුරක්. තක්කාලි වලින් එක එක කෑම වර්ග හදනවා. ඒ අතුරින් තක්කාලි සෝස් කියන්නේ බොහෝ දෙනෙක් කැමති ආහාරයක්. තක්කාලි සෝස් සමහර ආහාර රසගන්වනයක් ලෙසත් යොදාගන්නවා. විශේෂයෙන් බේකරි නිෂ්පාදන සමඟ (මාළු පාන්, සොසේජ් බන්, පේස්ට්‍රි) තක්කාලි සෝස් හොඳින්ම ගැලපෙන ආහාරක්. ඒ විතරක් නෙවෙයි විවිධ මස් වර්ග සහ ව්‍යංජන සෑදීමේදී රසගන්වනයක් ලෙස තක්කාලි සෝස් යොදාගන්නවා. ඉතින් මේ කියන්න යන්නේ තක්කාලි සෝස් කොහොමද ගෙදරදීම පහසුවෙන් හදාගන්නේ කියලා.

මේ තියෙන්නේ අවශ්‍ය දේවල්
ඉදුණු තක්කාලි කිලෝ 1ක්, තක්කාලි පේස්ට් කෝප්ප භාගයක්, සුදු ළුණු යුෂ තේ හැඳි 1ක්, මිරිස් කුඩු මේස හැඳි 2ක්, විනාකිරි කෝප්ප 4ක්, සීනි ග්රෑම් 250ක්, ලුණු කුඩු තේ හැඳි 1 1/2ක් , කුරුඳු කුඩු තේ හැඳි භාගයක්, ඉඟුරු යුෂ මේස හැඳි 1ක්.

මේ තියෙන්නේ තක්කාලි සෝස් හදන හැටි
තක්කාලි කිලෝ 1ක උතුරන වතුරට දමා ස්වල්ප වෙලාවක් තබා පිටතට ගෙන පොතු ගලවා ගන්න. ඉන්පසුව හොඳින් පොඩි කර ගන්න. තක්කාලි ඉස්ම පෙරේනයකින් පෙරාගෙන ඇට ඉවත් කර ගන්න. මැටි බඳුනක් ගෙන තක්කාලි පේස්ට්, සුදු ළුණු යුෂ, මිරිස් කුඩු, විනාකිරි කෝප්ප 4 සහ සීනි, කුරුඳු කුඩු, ඉඟුරු යුෂ, ලුණු කුඩු, සහ තක්කාලි යුෂ සියල්ල දමා උකු වන තුරු හැඳිගාමින් පිස ගන්න. නිවුණු පසු බෝතලයකට දමා අසුරා ගන්න. (සැලකිය යුතුයි වීදුරු බෝතලයට දැමීමට පෙර බෝතලය ජීවානුහරණය කල යුතුයි).