කන් බෙරය සිදුරු වෙන මේ වැරදි කවදාවත් කරන්න එපා
2,027 Views
අද උදේම මට හමුවුන අවුරුදු 2ක දරුවෙක් නිසා මේ කතාව කියන්න හිතුනෙ. අවුරුදු 2ක දරුවෙක් සමඟ අම්මා කෙනෙක් ආවා. බබා හොඳටම අඬනවා කන අල්ල අල්ල. පිටතින් බැලුවම නම් කිසිම වෙනසක් පෙන්න නැහැ. ළමයා හොඳටම චෝදනාවන් ඉන්න බව පේනවා. ඇයි අම්මෙ මේ බබාට මොකද? අනේ මහත්තයෝ කනේ අමාරුවක්ද කොහෙදෙ.. රෑ තිස්සෙම නින්දක් නෑ. එලිවෙනකල් ඇඩුවා. හරි ඉන්නකො. අපි බලමු කනේ මුකුත් ප්‍රශ්නයක් තියනවද කියල?
අම්මගෙන් විස්තර අහන අතරේ ඉක්මනින්ම දරුවා පරීක්ෂා කලා. කන. බලන්න තියා ළමයා ළඟට යන්නවත් දෙන්නෙ නෑ එ තරම් බලවෙලා. කැක්කුමක් ඇති කන අල්ල අල්ල අඩනවා. බබාගෙ තාත්තත් හිටපු නිසා අමාරුවෙන් අල්ලගෙන කන පරීක්ෂා කරන උපකරනයෙන් ඉක්මනින්ම බැලුවා.
දැන් කාරනය පැහැදිළියි මට නම්. කන ඇතුලේ ලේ ගැලීමක් වෙලා. කලාදුරුත් තියනවා. කලාදුරු නම් කනේ තියන එක සාමාන්‍ය දෙයක්නෙ. කාගෙත් කනේ තියන දෙයක්නෙ මැලියම් හෙවත් කලාදුරු කියන්නේ. එ්ක ගැටලුවක් නැහැ. නමුත් මේ ලේ ගැලීම? මොකද උනේ අම්මෙ විස්තර කියන්නකො? කොහාමද එකපාරටම කනේ කැක්කුම හැදුනෙ බබාට?
අම්මා නිරුත්තරයි. ගොත ගහන පාටක් පේනවා. එක පාරටම බබාගේ පියා කියාගෙන කියාගෙන යන්න පටන් ගත්තා. මම හැමදාම කියනව මහත්තයෝ මේ එක එක දෙවල් කනට දාන්න එපා කියල. කෝ අහනවයැ. අර කන් හැන්දෙන් කලාදුරු අයින් කරන්න ගිහින්නෙ ඔය කරගෙන තියෙන්නෙ. අම්මා හෙමින් හෙමින් husband ට බනියි. එතන දැන් පොඩි වලියකි.
කරල නම් තියෙන්නෙ හරිම වැරදි වැඩක්. කව්ද කියල තියෙන්නෙ කන් හැඳි වලින් කන්වල කලාදුරු ඉවත් කරන්න කියලා? දැන් පේනවනෙ බබාගෙ කන තුවාල වෙලා තියෙන්නෙ. මම බබාව ENT වාට්ටුවට ඇතුල් කරනවා. ENT ලොකු මහත්තය බලල ප්‍රතිකාර දෙයි. අවශ්‍ය දේ කරයි.
කිසිම හේතුවක් මත බබාගේ කන් වලට කිසිදු දෙයක් දාන්න එපා. ගොඩක් අය කරන තවත් වැරද්දක් තමයි කොට්න් බඩ් කියන එ්ව දාල කන පිරිසිදු කරන එක. දරුවෙකුට තියා වැඩිහිටි කෙනෙක් උනත් මේ දේවල් කන් වලට දාන්න සුසුදු නෑ. අඩුතරමින් ගෙදරකට ගෙන්න වත් සුදුසු දේවල් නෙමෙයි මේ. මොකද මේ සිද්දිය අපි දැකපු පළමු වතාව නම් නෙමෙයි. මාසයකට කීප දෙනෙක් මෙහෙම වැරදි දේවල් භාවිතා කරලා නිකරුනේ අනවශ්‍ය ලෙඩ හදාගන්නවා.
උගුර කන නාසය පිළිබඳ විශේෂඥ වෙෙද්‍යවරයා පරීක්ෂා කිරීමෙන් පසු දරුවාගේ කන් බෙරයට හානි වී ඇති බවත්, දරුවාගේ ඇසිමට බලපෑමක් ඇති බවත් ඒ නිසා ශල්‍යකර්මයක් කර නිවැරදි කළ යුතු බවත් දැනගන්නට ලැබුනා. ඒ සමඟම තවත් දිනක සිදුවූ සිද්ධියක් මතක් උනා. ඒ කතාව කොට්න් බඩ් සම්බන්ධයෙන් මේ වගේම දෙයක්.
මේ ආකාරයටම අවුරුදු 4 ක පමන දරුවකුගේ කන සුද්ද කිරීමට කොට්න් බඩ් දැමූ විට එහි බඩ් එක එනම් පුළුන් බඩ් එක කන ඇතුලෙ හිරවෙලා. එ් තමයි කොට්න් බඩ් නිසා වෙන්න පුළුවන් තවත් එක හානියක්. ඉතින් අමම්ලා කරන මේ වැරදි නිසා මේව එළියට ගන්න ගියාම දරුවන්ට තමයි දුක් විඳින්න වෙන්නෙ. කන් බෙරය සිදුරු උන අවස්ථාවන් එමටයි. සමහර විට ශල්‍යකර්ම පවා කරන්න වෙන්නත් පුළුවන්. අනිත් කාරනය කොට්න් බඩ් වලින් පිරිසිදු කරන්න යාමෙන් කලාදුරු කන ඇතුලටම තල්ලු වෙන්නත් පුළුවන්. එහෙනම් බලමු නිවැරදි ආකාරයට දරුවන්ගේ කන් සුද්ද කරන්නෙ කොහොමද කියල. ඇත්තටම කිව්වොත් කන් සුද්ද කරන්න අවශ්‍යතාවයක් නෑ.
සාමාන්‍යයෙන් කන පිරිසිදු කිරීම පිරිසිදු රෙදි කැබැල්ලකින් පමනක් කළ යුතුයි. කන ඇතුලේ කුහරය තුළ පිරිසිදු කිරීම කිසිවිටකත් නොකරන්න. කන්පෙත්ත හා කනේ සිදුර වටා ප්‍රදේශය පිරිසිදු තෙත රෙදි කඩකින් පිරිසිදු කළ හැකිය. හොඳින් නිවාගත් පිරිසිදු උනු ජලය භාවිතා කරන්න. පිරිසිදු තෙත පහන් තිරයක් වැනි දෙයක් යොදා ගත්තත් එය කන ඇතුලට ඇතුල් කිරීමෙන් වලකින්න. කිසිවිටකත් කන තුළට ජලය ඇතුලු නොවීමට වගබලා ගන්න.
මොකද මම කලින් විස්තර කළා වගේ කන් මැලියම් කියන්නෙ කනේ ආරක්ෂාවට තියන හොඳ දෙයක් මිසක් නරක දෙයක් නෙවෙයි. මෙතන ගැටළුව තියෙන්න මැලියම් අධික වෙලා කන් සිදුර වැහෙන්න තරමට වැඩි උනොත් කනේ කැක්කුම, කන කන ගතිය, ඇසිමේ අඩුකමක් එන්න පුළුවන්. අන්න එහෙම දෙයක් නම් අනිවාර්යයෙන්ම වෙෙද්‍යවරයකුට පෙන්වා උපදෙස් හා ප්‍රතිකාර ගත යුතුයි.
මෙහිදී වෙෙද්‍යවරයා අනිවාර්යයෙන්ම කන පරීක්ෂා කර බලා එ් අනුව කන මැලියම් වලින් බිලොක් වීමට තරම් වැඩිවී ඇත්නම් කනට දැම්මට Drop එකක් හෝ අවශ්‍ය ප්‍රතිකාර දෙනු ඇත. වෙෙද්‍යවරයකු එ් එ් අවස්ථාවට අනුව අනුමත කළ දියරයක් පමනක් කනට දැමිය හැකි අතර කලින් අවස්ථාවල ලබාදුන් හෝ වෙනත් කෙනෙකුගේ කනේ ආබාධයකට ලබාදුන් දියරයක් පාවිච්චි කිරීමෙන් වලකින්න. කිසිවිටකත් කන තුළට ඇඟිලි දැමීමෙන් වලකින්න.
සමහර විට කනේ වේදනාව ආසාදනයක් නිසා විය හැකිය. බොහෝවිට එය සමග ශ්වසන පද්ධතිය සම්බන්ධ රෝග ලක්ෂන ද ඇති වී තිබිය හැකිය. කෙසේ නමුත් දරුවා පරීක්ෂා කරන වෙෙද්‍යවරයා නිසි ප්‍රතිකාර ක්රමය තීරනය කරාවි. ඔහුට එය බාර දෙන්න. ගෙදරදී අත් බෙහෙත් කිරීම හෝ කිසිදු උපකරනයක්, (වෙෙද්‍ය නිර්දේශයකින් තොරව) කිසිදු දියරයක් කන තුළට දැමීම කිසිසේත් ම නොකරන්න. ස්තුතියි. දෙයක් දැනගත්තා නම් Share කරන්න.
(උපුටා ගැනීම Doctor BabyPage)
